Það er margt í lífinu sem kemur manni á óvart. Stundum koma hlutirnir manni skemmtilega á óvart, stundum miður. En ég er alltaf að komast betur að því að það sem skiptir máli er hvernig maður tekur því sem lífið færir manni. Er glasið hálf-fullt eða hálf-tómt? Þetta hljómar eins og gömul klysja, en er alveg dagsatt. Það erum við sem ákveðum hvernig við bregðumst við þegar hlutirnir fara ekki alveg eins og við áttum von á...
Það eru ófá leyfin sem við Wissler þurfum frá kaþólsku kirkjunni til að fá til að geta gift okkur. Ég er ekki kaþólsk, og því þarf hann leyfi til að gifast mér. Presturinn sem mun gifta okkur er ekki frá Minnesota fylki og því þarf hann leyfi til að mega framkvæma athöfnina. Kapellan þar sem giftingin mun fara fram er ekki kaþólsk og því þarf leyfi fyrir henni. Og síðast en ekki síst, þá þurfum við Wissler að standast brúðkaups undirbúningsnámskeið frá kaþólsku kirkjunni. (Kaþólska kirkjan vill greinilega gera þetta erfitt, en við erum til í hvaða þrautagöngu sem er ;) ) Þetta reddast allt, því það er nægur tími til stefnu og við máttum fara á þetta námskeið hjá kirkjunni hér í St. John´s J
Ég kemst ekki hjá því að minnast aðeins á þetta námskeið, en við fórum á það þarsíðustu helgi. Ég var meira en lítið stressuð áður en við fórum, því ég var ekki viss hvort við máttum segja frá því að við byggjum saman eða neitt. Svo þegar ég las kynningarbæklingnum sá ég að einn kúrsinn var um "healthy sexuality and intimacy" (!). Holy cow. Fór að velta fyrir mér hvort ég myndi verða vandræðaleg að ræða þetta í hóp, eða hvort ég myndi bara fá kjánahroll. EN, ég mætti á staðin – jákvæðnin uppmáluð – og þá kom á daginn að þetta var bara eðliegt spjall um samskipti fólks. Og ekkert minnst á "sexuality" – fjúkk. Fólkið sem stýrði námskeiðinu vissi nákvæmlega hvernig fólk lifir í dag og var ekkert að þykjast – enda ekki hægt þar sem flest fólkið á námskeiðinu var búið að vera saman yfir mörg ár og áttu börn (the jig is up). Í heild var þetta mjög skemmtilegt og fróðlegt námskeið þar sem talað var um ýmislegt: framtíðardrauma, peningamál, hvernig stuðla megi að góðum samskiptum, leiðir við að útkljá ágreiningsmál, og mikilvægi þess að rækta sambandið. Það er ekki allt svo galið hjá kaþólsku kirkjunni J
Síðustu helgi fór ég að sníkja (trick or treat!) með dóttur vinkonu minnar. Það er endalaust mikið gert úr Halloween hér í St. John´s – ég hef bara aldrei séð annað eins. Þeir skreyta eins mikið og við gerum á jólunum! En ekki kvarta ég, mér finnst alltaf gaman að gera sér dagamun J
Þá til Bandaríkjanna. Það kemur örugglega engum á óvart að í dag eru forsetakosningar í Bandaríkjunum. Þótt ég styðji Obama, þá finnst mér báðir kandídatarnir verðugir, ólíkt því sem var í síðustu kosningum þar sem mér fannst hvorugur spennandi kostur (Bush og Kerry). McCain hefur sannað að hann er maður orða sinna og með Obama kemur ferskleiki sem er þarfur eftir erfiðleika síðustu ára. Það er spennandi að vita hvort Bandaríkjamenn eru tilbúnir til að fá sinn fyrsta svarta forseta. En hvor sem vinnur, þá vona ég að USA hafi lagað kosningakerfið sitt. Ég horfði nefnilega á "Recount" um daginn, en það er mynd um kosningarnar árið 2000 þegar Flórída kosningarnar fóru í algjört mess. Kosningavélarnar klikkuðu, þúsundum manna var vísað frá kjörstöðunum vegna rangra sakargifta, og aðrar þúsundir kjörmiða voru aldrei taldir. Það var ótrúlegt að horfa á þessa mynd vitandi að þetta gerðist í alvörunni. En nú krossleggjum við bara fingur og vonum að sem flestir kjósi og allt gangi vel.... jú, og Obama vinnur ;) Það er eitthvað ofsalega spennandi við kosningar...
Og að lokum heim til Íslands. Við Íslendingar verðum þessa dagana að hugsa um allt það góða við landið okkar. Muna hvaðan við komum (Danir sögðu t.d. að við myndum aldrei geta staðið á eigin fótum) og meta okkur að verðleikum. Vera þakklát fyrir það sem við höfum og passa okkur að missa okkur ekki í bölsýninni. Við tölum eins og himinn og jörð séu að farast, enda sjást varla jákvæðar fréttir í fjölmiðlum. Fólk smitast nefnilega af hugarfari annarra; við dettum í neikvæðni þegar við erum í kringum neikvætt fólk og við lítum bjartari augum á málin þegar fólkið í kringum okkur er jákvætt. Rífum okkur uppúr þessu efnahagsástandi með yfirvegun og framtíðarsýn. Þess vegna vil ég enda á "dæmisögu um kreppuna" sem mamma sendi mér um daginn. Njótið vel J
Smá dæmisaga vegna hinnar svokölluðu "kreppu"
Íslensk kona hefur verið að styrkja námsmann í Uganda sem "óvænt varð á vegi hennar" eins og hún orðaði það. Hann var búinn að lofa að senda henni einkunnirnar sínar sem hann og gerði þegar þar að kom. Þar kom fram að hann hafði fengið A í öllum fögum og góða umsögn að auki. Það var nefnilega búið að gera honum ljóst að góður árangur væri lykillinn að því að hann fengi áframhaldandi styrk.
En allt er breytingum undirorpið í henni veröld og ýmislegt getur vissulega haft áhrif á afkomu Frónbúans og getu hans til að láta gott af sér leiða. Hún var að velta því fyrir sér hvort rétt væri að reyna að segja honum frá gangi mála hér á landi, þ.e. kreppunni og öllu því. Og það gæti því miður reynst nauðsynlegt að skera eitthvað niður styrkinn vegna hins breytta ástands hérna megin. Það eru nefnilega tiltölulega litlar líkur á því að fréttir af Íslenska skipbrotinu hafi borist alla leið til hans þarna í Entebbe. Og svo er alls ekki víst að hann skilji alvöru málsins á sama hátt og við hér heima. En ef reynt væri að útskýra hið Íslenska kreppuástand fyrir honum sem virðist ætla að fara langt með að sliga þjóðina einhver þó nokkur ár inn í framtíðina, gæti það samtal orðið á eftirfarandi nótum.
*Heyrðu félagi, það er úr vöndu að ráða. Íslenska þjóðin er gjaldþrota!
Hvað segirðu, en leiðinlegt að heyra, eigið þið þá ekki fyrir baunum og maís?
*Jú reyndar eru búðir fullar af mat og enginn vöruskortur.
Hvað segirðu, þið eigið þá mat. Það er gott. En eigið þiðþá ekki þak yfir höfuðið lengur!
*Jú við eigum reyndar íbúð eins og flestir og það eru fáir heimilislausir á Íslandi.
En hvað segirðu mér þá? Gengur plága yfir landið, eru allir veikir og heilbrigðiskerfið lamað?
*Nei nei reyndar ekki, við fáum nánast ókeypis læknaþjónustu og erum með ágætt heilbrigðiskerfi.
Nú jæja. Það var gott að heyra. En eru þá skólarnir að loka og fá kannski ekki allir tækifæri til að læra að lesa lengur og sérstaklega þá ekki konur.
*Jú reyndar er 99,9% læsi á Íslandi og menntakerfið er ágætt, margir með háskólagráður og konur ekki síður en karlar.
Það er nú gott, en þið verðið þá að passa er að lenda ekki í stríði við nágrannaþjóðir ykkar.
*Uuuu við erum reyndar ekki með her og teljumst nú frekar friðsæl þjóð. En við þurfum bara að hlusta á bullið og stríðsyfirlýsingarnar í fíflinu honum Gordon Brown. Það er það sem við munum líklega komst næst því að fara í stríð.
Ok. Segðu mér nú samt ekki að þið komist ekki í hreint vatn.
*Við eigum reyndar besta vatn í heimi.
Nú, er vegakerfið þá ónýtt? Hérna í Afríku ganga allir eða nota asna og stundum reiðhjól. Það eru líka til strætisvagnar hérna, en þeir eru alltaf yfirfullir.
Eru kannski strætóarnir hjá ykkur hættir að ganga?
*Neeee... Það er verið að ræða um hvort almenningssamgöngur hér eigi að vera ókeypis, en það eru flestallir vegir malbikaðir og næstum allir eru á nýlegum bílum.
Eigið þið þá enga peninga til að gera ykkur glaðan dag? Ég meina, þú sagðir að þjóðin væri gjaldþrota.
*Flestir eiga reyndar einhvern sparnað á bókum þó sumir hafi tapað honum eða hluta hans síðustu daga. Það verður alla vega erfitt að kaupa stærri flatskjái og utanlandsferðunum verður að fækka.
Já, ég á kannski einhvern tíma eftir að fara til útlanda, en ég er nú líka frá Uganda. Hefur kannski enginn vinnu og þurfið þið núna öll að betla?
*Neiiij...! Atvinnuleysið er um 2% en við verðum að flytja Pólverjana aftur heim og fara sjálf að vinna vinnuna sem þeir unnu.
Hmmm... Svo þið hafið peninga, mat, húsaskjól, heilbrigðiskerfi, menntakerfi, búið við frið, eigið nóg hreint vatn og samgöngur eru góðar.
Segðu mér, hvert var vandamálið aftur?
Eftir þessar vangaveltur um aðstæður okkar hérna uppi á skerinu og þetta ímyndaða samtal, ákvað hún að vera ekki að íþyngja honum með ræfilslegum áhyggjum sínum af "gjaldþrota" eyríki norður í ballarhafi. Námsgjöld hans skulu greidd hér eftir sem hingað til og kannski fær hann líka smá vasapening með. Hann getur þá kannski tekið strætó í skólann endrum og sinnum í stað þess að þurfa ganga í marga klukkutíma eins og venjulega. Fé hins meinta íslenska terrorista yrði þá líklega bara vel varið.
